«Барселона» устози шогирдларидан мамнун, «Атлетико» мураббийи ҳали таслим бўлмаган, бу вақтда Обамеянг «Реал»га ўтиш ниятида

Кеча — 1 февраль куни Испания кубогининг финал чиптаси учун «Атлетико» ва «Барселона» клублари Мадриддаги «Висенте Калдерон» стадионида ўзаро саф тортди. Учрашув каталонияликларнинг 2:1 ҳисобидаги ғалабаси билан якунига етди.

Тўқнашувдан кейин ҳар икки клуб бош мураббийлари журналистлар билан матбуот анжуманида иштирок этди.

Икки ўйиндан иборат тўқнашув учун яхши ибтидо. Бизни «Висенте Калдерон»да қийин учрашув кутиб турганини билгандик.

Биринчи бўлимда хавфли ҳужумлар яратдик ва улардан фойдаландик. Иккинчи бўлим биринчисидан катта фарқ қилмади. Бироқ унда «Атлетико» кўпроқ ҳужум қилди ва биз бўш зоналар ярата олмадик. Рақиб гол уриб олгач, курашга қайтиб киргандек бўлди. Чунки ҳали ҳеч нарса ҳал бўлиб улгурмаганди. Биз гол уриб, кўп нарсани ҳал қилишимиз ҳам, гол ўтказиб аҳволимизни қийинлаштиришимиз ҳам мумкин эди.

Ўйин ҳақида салбий фикрлар? Мен икки жамоа ҳақида ҳам ёмон фикр билдирмоқчи эмасман. Балки яхшироқ ўйнашимиз ҳам мумкин эди. Бироқ буниси энди теория.

Энди ким кўпроқ таваккал қилиши аниқ. «Атлетико» «Камп Ноу»да ўзининг энг яхши ўйинини кўрсатишга ҳаракат қилади. Биз эса тўпни ушлаб туришга ва яна бир марта зафар қучишга уринамиз.

Луис Энрике, «Барселона» бош мураббийи

«Барселона» ўйинни яхши бошлади. Улар ярим ҳимоя хатосидан фойдаланиб, ҳисобни очиб олишди. Кейин Месси ўзининг чиройли голини урди. Бу эса бизнинг биринчи тайм учун қилган режаларимиз ва қурган ўйин тактикамизни бузиб юборди.

Иккинчи таймда ўзимизга кўпроқ ўхшадик. Ҳисобни тенглаштириб олишимиз мумкиндек кўринганди, бироқ «Барселона»дан 0:2 ҳисобида енгилиб туриб, кейин етиб олиш осон эмас.

Ечиниш хонасида нима дедим? Бу ўша ернинг ўзида қолади. Айтишим мумкин бўлгани менга иккинчи таймдаги ўйинимиз ёқди.

«Барселона» беллашув фаворитимиди? Мен олдин ҳам бу ҳақда айтгандим ва ҳозир ҳам айтишга тайёрман. Бироқ кубок биз учун ҳам керакли турнир.

Биз вазиятни ўз томонимизга оғдириш учун ҳамма ишни қиламиз. «Барселона» ҳам ўйин тақдири ҳал бўлмаганини тушуниб турибди. Бизни яна бир қизиқарли беллашув кутиб турибди.

Диего Симеоне, «Атлетико» бош мураббийи

Пьер-Эмерик Обамеянг

«Атлетико» ва «Барселона» Испания кубоги финалчиси номини аниқлашга уриниб ётган бир пайтда, «Боруссия Дортмунд» сафида тинимсиз гол ураётган Пьер-Эмерик Обамеянг «Реал»га ўтиш нияти борлигини маълум қилди.

Агар янги босқичга чиқишни истасам, ёзда клубни тарк этишим керак. Ўйлашимча, «Реал» мен учун мақбул вариант. Бу мавзу етарли даражада акс-садо ҳам бериб турибди.

Кўпчилик мени Англияда кўришни истайди. Бироқ АПЛ мен тўп суришни истайдиган лига деб айта олмайман. Менга Ла лига кўпроқ ёқади. Париж ҳам ёмон вариант бўлмасди. Аҳир француз тили менинг она тилим.

Пьер-Эмерик Обамеянг, «Боруссия Дортмунд» аъзоси