Legioner.uz. Одил Аҳмедов «Шанхай СИПГ»даги расмий дебютини 7 февралда ўтказади, Қирғизистонга кетган Алишер Азизов туркман клубига гол урди

Одил Аҳмедов

Ўзбекистон миллий терма жамоаси сардори Одил Аҳмедов «Шанхай СИПГ» сафидаги илк расмий учрашувини 7 февраль куни ўтказади. Кеча — 31 январь куни Осиё Чемпионлар лигасининг ўтиш босқичи ўйинлари ўтказилгач, шанхайликларнинг расмий ўйинлардаги илк рақиби номи аниқ бўлди.

Бу йўлда Таиланднинг «Сукхотаи» жамоаси ўз уйида Мьянманинг «Яданарбон» клубини қабул қилди ва 5:0 ҳисобида зафар қучди. Энди тайлар Чемпионлар лигасининг гуруҳ босқичи масаласини ҳал қилиш учун «Шанхай СИПГ» билан плей-офф ўйинида иштирок этади.

Хитой Супер лигасининг янги қоидаларидан фарқли ўлароқ ОФКда легионерларнинг 3+1 квотаси амал қилмоқда. Унга кўра, Андре Виллаш Боаш қўли остида машғулот олиб бораётган беш нафар легионернинг тўрттасидан фойдаланиши мумкин. Шарти — улардан бири осиёлик бўлиши керак. Аҳмедов эса бу талабга жуда мос тушади. Шундан келиб чиқиб, ўзбекистонлик ярим ҳимоячи «Шанхай СИПГ»даги расмий дебютини катта эҳтимол билан 7 февраль куни ўтказади.

Алишер Азизов

Қирзиғистоннинг «Дордой» клуби шарафини ҳимоя қилаётган ўзбекистонлик футболчи Алишер Азизов нуфузи жиҳатдан қитъада Чемпионлар лигасидан кейин иккинчи ўринда турувчи клублар мусобақаси — ОФК кубогида гол уришга муваффақ бўлди.

«Дордой» Ош шаҳрида Туркманистоннинг «Болқон» клубини қабул қилди. Учрашувда ҳисоб 69-дақиқада туркманлар томонидан очилган бўлса, 78-дақиқага келиб Алишер Азизов 8 минг мухлис кузатиб бораётган ўйинда «Дордой»ни мағлубиятдан қутқариб қолди.

Ўтиш босқичи доирасидаги тўқнашувнинг жавоб баҳси 7 февраль куни Туркманистонда бўлиб ўтади.

ОФК кубоги Ўтиш босқичи 31 январь, сешанба

«Дордой» (Қирғизистон) — «Болқон» (Туркманистон) 1:1

Голлар: Нуртаган Мамедалиев, 69 (0:1). Алишер Азизов, 78 (1:1).