Актриса Муқаддас Саъдуллаева ортиқ ота-онаси билан бирга драматик фильмларда суратга тушмаслигини маълум қилди. Бу ҳақда у журналист Феруз Муҳаммадга берган интервьюсида айтиб ўтди.
Аввалроқ Муқаддас Саъдуллаева «Бебаҳогинам» мелодрамасида ўз ота-онаси — Ўзбекистон халқ артистлари Лутфулла ва Гулчеҳра Саъдуллаевлар билан бирга суратга тушгани, тасвирга олиш жараёнидан бир неча кун ўтиб, Лутфулла Саъдуллаев кичик инфарктни бошдан ўтказгани маълум бўлган эди.
«Олдин ҳам юраклари безовта қилиб турар эди. Бундан 8 йилча аввал Ҳиндистонда юрак операциясини бошдан ўтказганлар. Ҳар бир ролини юракдан ижро этадиган актёрни бу дард тинч қўймас экан. Шундай бўлишини билганимда, дадамнинг бу фильмда суратга тушишларига умуман йўл қўймасдим», — деди Муқаддас Саъдуллаева.
«Бундан сўнг дадам, онам билан биргаликда фақат комедия жанридаги фильмларда суратга тушаман. Мелодрама, драма жанрида биргаликда суратга тушишимиз, бу жанрлардаги менинг аянчли ҳолатим дадам ва онамга оғир таъсир қилар экан», — дея қўшимча қилди актриса.
Қайд этиш жоиз, «Бебаҳогинам» — Лутфулла, Гулчеҳра ва Муқаддас Саъдуллаевлар биргаликда суратга тушган илк фильм эди. Эътиборли томони, фильмда Лутфулла ва Гулчеҳра Саъдуллаевлар худди ҳаётдагидек Муқаддас Саъдуллаеванинг ота-онаси ролини ижро этган.
Маълумот учун, режиссёр Озод Шамс ҳамда продюсерлар Маҳмуд Эркабоев ва Давлатбек Йўлдошев томонидан суратга олинган «Бебаҳогинам» мелодрамасининг фақат журналистлар учун мўлжалланган ёпиқ премьераси 1 февраль куни Next Cinema’да бўлиб бўлиб ўтади. Фильмнинг кенг жамоатчилик учун тақдимоти эса 13 февраль куни Киночилар уйида ҳамда Алишер Навоий номли киносаройда ўтказилиши режалаштирилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)