Ўз тарихида илк бор мамлакат чемпионлигини қўлга киритган Тошкентнинг «Локомотив» футбол клуби футболчилари совға сифатида раҳбариятдан Lacetti автомобилларини қабул қилиб олганди. Айни пайтда шуларнинг 5 нафари «темирйўлчилар» билан хайрлашиб улгурди.
Клуб уч нафар футболчи билан шартномани узайтиришни истамади. Қизиқ томони, улар турли хил позицияларда тўп сураётганди: ҳимоячи Неманя Яничич (Сербия), ярим ҳимоячи Артур Геворкян (Туркманистон) ва ҳужумчи Иван Нагаев (Ўзбекистон).
Яничич сўнгги икки мавсумини «Локомотив» сафида ўтказди. 2016 йилнинг катта қисмида эса жароҳати сабаб «темирйўлчилар»га ёрдам бера олмади. Артур Геворкян ўтган мавсумнинг иккинчи ярмида сафга қўшилди ва ярим йилдаёқ Тошкент гранди билан хайрлашди. Иван Нагаев жароҳатлардан қутула олмади ва ўзига билдирилган ишончни оқламади. Мавсум сўнггида унга Lacetti ҳам насиб қилмади ва фақатгина пул мукофоти билан чекланди.
«Локомотив» сафини яна уч футболчи хориж клубларига ўтиб кетгани учун тарк этди. Аввалига Сервер Жепаров Эроннинг «Истиқлол» клуби билан шартнома имзолаган бўлса, кейинроқ Қатарнинг «Ас-Сайлия» клуби ҳужумчи Темурхўжа Абдухолиқов ва ярим ҳимоячи Санжар Шоаҳмедовни ўз сафига қўшиб олди.
Бу футболчилар «Локомотив»ни тарк этмаган бир пайтда клуб Осиё чемпионлар лигасининг ярим финалига етиб боришни кўзлаётгани ҳақида хабар чиққанди. Айни вақтда «темирйўлчилар»нинг мазкур мусобақадаги энг яхшиси натижаси чорак финал бўлиб турибди.
Олий лигада 22 та гол уриб, тўпурарлар пойгасида етакчилик қилган Темурхўжа Абдухолиқов ва Осиёнинг икки карра энг яхши футболчиси Сервер Жепаровга муносиб ўринбосар топилган ёки йўқлигига аниқлик киритилмаган. «Локомотив» ҳозирга қадар Кот-д’Ивуардан бўлган икки футболчини, шунингдек, «Насаф»дан Шуҳрат Муҳаммадиев ва «Олмалиқ»дан Диёр Туроповни сафга қўшиб олган.
Изоҳ (0)