Ватан ҳимоячилари куни муносабати билан бир гуруҳ ҳуқуқни муҳофаза қилиш органлари, мудофаа ва фавқулодда вазиятлар вазирликлари ходимлари мукофотланди

12 январь куни Ўзбекистон Президенти Шавкат Мирзиёев «Ватан ҳимоячилари куни ва Ўзбекистон Республикаси Қуролли Кучларининг 25 йиллиги муносабати билан ҳуқуқни муҳофаза қилиш органлари, мудофаа ва фавқулодда вазиятлар вазирликлари ходимларидан бир гуруҳини мукофотлаш тўғрисида»ги фармонни имзолади. Фармон матнини ЎзА келтирди.

Унга кўра, Ўзбекистон Республикаси Мудофаа вазирлиги Бош штаби бошқармаси бошлиғининг ўринбосари Маллабоев Абдусаттор Убайдуллаевич «Ёшларни миллий истиқлол ғояси ва она Ватанга садоқат руҳида тарбиялаш, юқори малакали кадрларни тайёрлашдаги алоҳида хизматлари, давлатимизнинг мудофаа қудратини янада юксалтириш, миллий хавфсизликни таъминлаш ишига қўшаётган салмоқли ҳиссаси ҳамда ижтимоий-сиёсий ҳаётдаги фаол иштироки учун» «Ўзбекистон Республикасида хизмат кўрсатган ёшлар мураббийси» фахрий унвонини олди.

Ўзбекистон Республикаси Мудофаа вазирлиги ҳарбий қисм командири Хамраев Абдулла Адхамович «Давлатимизнинг мудофаа қудратини янада юксалтириш, миллий хавфсизликни ва давлат чегаралари дахлсизлигини таъминлаш ишига қўшаётган катта ҳиссаси, миллий манфаатларимизни ҳимоя қилиш ҳамда тинчлик, барқарорлик ва жамоат тартибини таъминлаш борасидаги хизмат бурчини бажариш чоғида мардлик, жасорат ва фидойилик кўрсатгани учун» I даражали «Шон-шараф» ордени билан тақдирланди.

Бундан ташқари қатор ҳуқуқни муҳофаза қилиш органлари, мудофаа ва фавқулодда вазиятлар вазирликлари ходимлари II даражали «Шон-шараф» ордени, «Дўстлик», «Мардлик» орденлари, «Жасорат», «Содиқ хизматлари учун», «Шуҳрат» медаллари билан мукофотланди.