Синхрон сузиш бўйича олимпия чемпионлари шоуси Россия мудофаа вазирлигининг Ту-154 самолёти қулаши натижасида ҳалок бўлганлар хотирасига эълон қилинган мотам туфайли, бошқа кунга кўчирилди, дея хабар бермоқда «ТАСС» Россия синхрон сузиш федерацияси президенти Алексей Власенкога таяниб.
Шоу дастлаб 26 декабрга режалаштирилган эди. Власенконинг айтишича, тадбир 9 январь куни ўтказилади.
Ҳар йили анъанавий тарзда бўлиб ўтадиган тадбирни уч карра олимпия чемпионлари Мария Киселёва ва Ольга Брусникина олиб боради. Бу йил шоуда Олимпиада—2016 да ғолиб бўлган Россия термаси, беш карра олимпия чемпионлари Наталья Ишченко ва Светлана Ромашина иштирок этади.
Шоу дастурида Россия синхрон сузиш федерацияси йилнинг энг яхши спортчилари ва мураббийларини эълон қилади.
Аввалроқ Россия Мудофаа вазирлигига тегишли Ту-154 самолёти Қора денгизга қулаши муносабати билан, мамлакат федерал телеканаллари кўнгилочар кўрсатувларни эфирдан олгани хабар берилган эди.
25 декабрь куни тонгида Россиянинг Адлеридан Суриянинг Латакия шаҳрига учаётган Россия Мудофаа вазирлиги самолёти қулагани маълум бўлди. Ту-154 нинг бортида 92 киши, хусусан, 84 йўловчи ва экипажнинг саккиз аъзоси бўлган.
Авиаҳалокат муносабати билан Россия президенти Владимир Путин Ту-154 қурбонларининг оила аъзолари ва яқинларига ҳамдардлик билдирди, шунингдек, 26-декабрни Россияда умуммиллий мотам куни деб эълон қилди.
Изоҳ (0)