Россия федерал телеканаллари Ту-154 авиаҳалокати сабаб кўнгилочар кўрсатувларни эфирдан олди

Россия Мудофаа вазирлигига тегишли Ту-154 самолёти Қора денгизга қулаши муносабати билан, мамлакат федерал телеканаллари ўз кўрсатувлар жадвалига ўзгартиришлар киритди. Бу ҳақда «РБК» хабар бермоқда.

Хусусан, «NTV» телеканали «Киношоу» кўнгилочар дастурини 25 декабрь кўрсатувлар жадвалидан чиқариб ташлаган. «Кейинги кунлар жадвали қандай тартибга солинишини яқин вақт ичида ҳал қиламиз», — деди телеканал бош директори Алексей Земский.

«Биринчи канал» ҳам кўрсатувлар жадвалига ўзгартириш киритади. «Ҳозирча айнан нималар ўзгартирилиши ҳақида аниқ айта олмайман», — деди телеканал бош продюсери Александр Файфман. Унинг қайд этишича, телеканал авиаҳалокат оқибатида ҳалок бўлган ўз ходимларининг оилаларига кўмак кўрсатади.

«РИА Новости»нинг ёзишича, «Россия 1» телеканали ҳам кўрсатувлар жадвалини ўзгартиришини маълум қилган. Телеканал матбуот хизмати вакилининг айтишича, «Кулишга рухсат этилади» кўрсатуви эфирдан олинган. Унинг ўрнига бадиий фильм намойиш этилади.

25 декабрь куни тонгида Россиянинг Адлеридан Суриянинг Латакия шаҳрига учаётган Россия Мудофаа вазирлиги самолёти қулагани маълум бўлди. Ту-154 нинг бортида 92 киши, хусусан, 84 йўловчи ва экипажнинг саккиз аъзоси бўлган.

Йўловчиларнинг аксарияти Александров номидаги ашула ва рақс ансамбли аъзолари бўлган. Бортда, шунингдек, Россия «Биринчи канали», «NTV» ва «Звезда» телеканалларининг тасвирга олиш гуруҳлари ҳам бўлган.

Россия Мудофаа вазирлигидан маълум қилишларича, самолётда «Адолатли ёрдам» жамғармаси ижрочи директори Елизавета Глинка (Доктор Лиза) ҳам бўлган.

Сочи қирғоқларидан 6 километр узоқликда авиаҳалокат қурбонининг жасади топилган. Россия Мудофаа вазирлиги вакилининг маълум қилишича, қутқарувчилар самолёт бўлаклари ва йўловчиларнинг шахсий буюмларини топишга муваффақ бўлган.

Авиаҳалокат муносабати билан Россия президенти Владимир Путин Ту-154 қурбонларининг оила аъзолари ва яқинларига ҳамдардлик билдирди, шунингдек, 26-декбарни Россияда умуммиллий мотам куни деб эълон қилди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.