Расман: «Олмалиқ» клуби Игорь Шквиринни ўз вазифасидан озод этиб, ўрнига Виктор Кумиковни бош мураббий қилди

Виктор Кумиков «Олмалиқ» футбол клуби бош мураббийи сифатида таништирилди. Бу ҳақда «Championat.asia» нашри «Футбол Экспресс» газетасига асосланиб хабар берди.

10 декабрь куни «Олмалиқ» клубида йиғилиш бўлиб, Кумиков янги мураббий сифатида таништирилган. Бунга қадар жамоани 9 йил давомида бошқариб келган Игорь Шквирин ва унинг мураббийлар штаби эса вазифасидан озод этилган.

Маълумот учун, Игорь Шквирин «Олмалиқ» футбол клубини Олий Лигага қадам қўйган 2008 йилидан буён бошқариб келаётганди.

1963 йилда туғилган Виктор Кумиков Россия ва Қозоғистон клубларида ҳам фаолият олиб борган. Россиянинг «Автозапчасть», «Спартак-Нальчик» клубларини бошқарган. Шундан кейин Қозоғистонга йўл олиб, «Есил», «Елимай», «Қайсар», «Шахтёр», «Ордабаси» клубларида ишлаган.

Игорь Шквириндан фарқли равишда Виктор Кумиков ҳеч бир клубда 3 йилдан ортиқ ишламаган.

Виктор Кумиков 2006 йил Муборакнинг «Машъал» клуби билан Ўзбекистон Кубогининг финалига қадар етиб келган. 2009 ва 2010 йил «Насаф» билан чемпионатнинг бронза медалларига эга чиққан.

2011 ва 2012 йилги мавсумда Кумиков бошчилик қилган Қарағанданинг «Шахтёр» клуби кетма-кет икки бор Қозоғистон чемпионлигини қўлга киритган. 2013 йил Қозоғистон Кубоги ва Суперкубогида ғолиб чиққан.

Кумиков, шунингдек, 2011, 2012 ва 2013 йил Қозоғистоннинг энг яхши мураббийи сифатида тан олинган.