Англия миллий термасининг яқин ўтмишдаги юлдуз футболчилари ҳисобланган Фрэнк Лемпард, Жон Терри ва Стивен Жеррард жамоанинг мураббийлар штабидан жой олиши мумкин. Бу ҳақда «Чемпионат» The Sun нашрига асосланиб хабар берди.
Яқиндагина терма жамоани қабул қилиб олган Гарет Саутгейт бу уч юлдуз билан бирга ишлаш ниятида. Шу боисдан ҳам Англия Футбол Ассоциацияси трионинг мураббийлик лицензиясини тезроқ қўлга киритишига кўмаклашиб юбориш ниятида.Агар УЕФА Ассоциациянинг илтимосини қондирса, Терри, Лемпард ҳамда Жеррардга мураббийлик лицензиясини 18 ой ичида бериши ҳам мумкин.
Шу йилнинг ноябрь ойида 36 ёшли Стивен Жеррард фаолиятини якунлагани ҳақида маълум қилганди. Аллақачон 38 ёшни қарши олган Фрэнк Лемпард эса АҚШнинг «Нью-Йорк Сити» футбол клубида тўп суради. Шартномаси якунланиши билан у ҳам бутсасини михга илишга қарор қилган. Жон Террининг «Челси»даги шартномаси 2017 йилнинг ёзида ўз ниҳоясига етади. Лондон клуби унга янги шартнома таклиф қилганича йўқ.