«Навбаҳор» Одил Аҳмедовнинг қўнғироғи ва талабидан кейин Олий Лигадаги ўрнини сақлаб қолгани айтилди

Футбол бўйича Ўзбекистон Олий Лигасидаги ўрнини сақлаб қолганидан кейин Наманганнинг «Навбаҳор» клуби бош мураббийи Илҳом Мўминжонов журналистлар саволларига жавоб қайтарди, деб ёзди «Championat.asia».

«Клуб Олий Лигада қолгани билан бутун Наманган шаҳрини табриклайман. ‘Навбаҳор’ ҳар доим Олий Лигада бўлган», — деб гап бошлади Илҳом Мўминжонов.

«‘Навбаҳор’га келишимга Одил Аҳмедовнинг қўнғироғи сабаб бўлган. Аҳмедов билан кўришиб, гаплашиб олгач, клубни қабул қилиб олганман. Шундан кейин Наманган вилояти ҳокимига ‘Навбаҳор’ни Олий Лигада олиб қолишга ваъда берганман. Футболчилар билан бу ишни уддалашга кўзимиз етганди», — деди мураббий.

«Жамоа 20 декабрга қадар таътилга чиқади. Кейинчалик ўзгаришлар бўлади. Асосан маҳаллий футболчиларга эътибор қаратмоқчиман. Наманганлик кўплаб йигитлар бошқа жамоалар сафида ҳаракат қилади. Биз ўша футболчиларни жамоага жалб этишга уриниб кўрамиз», — деб айтиб ўтган Илҳом Мўминжонов «Навбаҳор» билан шартномаси шу йилнинг охирида якунига етишини қўшимча қилган. Шундан келиб чиқиб юқоридаги ўзгаришлар келаси мавсум учун айтилганми ёки йил охиригача бўладими — ойдинлик киритилмаган. Мураббий сўзига кўра, янги шартнома масаласи ҳали кўриб чиқилмаган.

«Қайтариб айтаман, Одил Аҳмедов туфайли мен ‘Навбаҳор’га келдим. Аҳмедов ва вилоят ҳокими олдимизга қўйган вазифани уддаладик», — деди Мўминжонов.

Маълумот учун, «Навбаҳор»ни Олий Лигада олиб қолиш талабини қўйган Одил Аҳмедов Наманган клубида эмас, Тошкентнинг «Пахтакор» клубида юлдузлик даражасига кўтарилган. Наманганда таваллуд топган футболчи айни вақтда Россиянинг «Краснодар» клубида тўп суради.