Луис Энрике «Барселона» рақибидан кучсиз бўлганини тан олди, футболчилар эса 1 очкодан хурсанд бўлди (видео)

Каталониянинг «Барселона» клуби Испания Ла Лигасининг 13-турига келиб яна 2 очко бой берди ва «Реал» билан орадаги фарқни 6 тага ошириб юборди.

«Чемпионат» нашри учрашув ҳақида футболчилар ва мураббийлар фикрини келтириб ўтди. Улардан билиш қийин эмаски, «Барселона» рақибидан яққол кучсиз футбол намойиш қилган. Клуб аъзолари қўлга киритилган 1 очкодан хурсанд.

Луис Энрике

«Натижадан жуда хурсандман. Биз очко олишнинг имкони йўқдек кўринган ўйинда очко ишладик. Рақиб ‘Барселона’дан яққол устунлик қилди. Агар бугун жамоалар футболка алмашиб тўп сурганида, ‘Реал Сосьедад’ футболчиларини ‘Барселона’ аъзолари деб ўйлаш мумкин эди. Бу шундай тушунтиришки, унинг ёрдамида биринчи жамоа иккинчисидан яққол кучли бўлганини пайқаш қийин эмас. Энг ажабланарлиси, биринчи бўлимдан кейин ҳисобнинг дуранг бўлиб тургани».

Херард Пике

«Биз ҳар доим ҳам бундай демаймиз, аммо тан олиб айтиш керакки, дуранг биз учун ёмон натижа бўлмади. Мана шундай учрашувда очко олганимизни қониқарли натижа деб ҳисоблайман. Рақиб ўйин бобида ҳам, истак борасида ҳам устунлик қилди. Айниқса биринчи бўлимда ‘Барселона’ майдонда умуман кўринмади. ‘Реал Сосьедад’ эса даҳшатли ўйнади, бутун ўйин давомида прессинг уюштириб, бизни майдоннинг иккинчи ярмига қамаб ташлади. Бундай ўйини билан ‘Барса’ Ла Лигани ютишга жуда қийналади».

Карлос Вела («Реал Сосьедад»)

«‘Реал Сосьедад’ ғалабага муносиб ўйин намойиш қилди. Ҳамма имкониятларимиздан фойдаланиб, рақибни мағлуб этишга яқин эдик. Шунга қарамай, майдондан бошимизни юқори кўтариб чиқиб кетдик. Биз шундай давом этишимиз керак. ‘Барселона’дек клуб тўпсиз ҳаракат қилаётганида унга яхшигина бош оғриқ туғдириш мумкин».

Денис Суарес

«Улар бизга биринчи бўлимда ҳеч қандай имконият қолдирмади. Рақиб деярли 20 та бурчак зарбасини амалга оширди. Ўйинимиз чиқмади, бу вазиятни эса ўзгартиришимиз керак. Аҳир барча яккакурашларда мағлуб бўлдик. Мақсадимиз эса барча стадионларда ғолиб чиқиш».

Маълумот учун, «Барселона» Сан-Себастьян шаҳрида кетма-кет етти мавсумдан буён «Реал Сосьедад»ни мағлуб эта олмайди. «Аноэта» стадионида «Барса» сўнгги бор 2006/07 йилги мавсумда рақибини таслим қилган.