Ўзбекистон касаба уюшмалари ва Халқаро меҳнат ташкилоти (ХМТ) семинарида пахта кампанияси вақтида ўтказилган болалар меҳнати ва мажбурий ишга жалб қилиш бўйича миллий мониторингнинг дастлабки натижалари маълум қилинди. Бу «Газета.uz» хабар бермоқда.
Касаба уюшмалари федерацияси матбуот хизматига кўра, миллий мониторингни ўтказиш учун 11 та ҳудудий ишчи гуруҳи ташкил этилиб, уларнинг етакчилари ХМТ экспертлари иштирокидаги ўқувларда қатнашди.
Мониторинг гуруҳлари республиканинг барча ҳудудларидаги корхона, ташкилот ва муассасалар, фермер хўжаликлари, пахта майдонларига тасодифий тартибда ташриф буюрди. Кузатувлар нафақат болалар меҳнати ва мажбурий ишга жалб қилиш, балки теримчиларга яратилган меҳнат шароитлари, тўлов ва дам олиши масалалари бўйича ҳам олиб борилди. Мониторинг даврида ҳудудий гуруҳлар 6615 нафар респондент билан интервью ўтказди.
Кузатувчилар маълумотига кўра, жорий йилги пахта терими мавсуми бошланишига қадар ҳамда ушбу давр мобайнида мутасадди ташкилотлар томонидан болалар меҳнатидан фойдаланиш ва мажбурий ишга жалб қилиш ҳолатлари содир этилмаган. Тиббиёт ва таълим муассасаларининг узлуксиз ишлаши таъминланди. Ўрта таълим муассасаларида давомат 93,8 фоизни ташкил этди. Транспорт, бозор, савдо ва хизмат кўрсатиш корхоналари, дорихоналар нормал тартибда фаолият кўрсатди.
Республиканинг барча туман ва шаҳарларида теримчилар пахта йиғим-терим ишларига эркин тарзда ёлланиши тўғрисидаги 500 дан зиёд баннер ҳамда эълонлар ўрнатилди. Корхона ва ташкилотларда болалар меҳнати ва мажбурий меҳнатга йўл қўйилмаслиги тўғрисидаги 44,5 минг плакат жойлаштирилди. Иш берувчилари ва фермерлар ўртасида меҳнатга мажбурий жалб қилиш ва болалар меҳнатидан фойдаланганлик учун маъмурий жавобгарлик тўғрисидаги 100 минг флаер тарқатилди.
Изоҳ (0)