Бугун, 2 ноябрь куни Ўртачирчиқ туманидаги Тошкент вилоят маънавият-маърифат маркази мажлислар залида Ўзбекистон Республикаси президентлигига Ўзбекистон Халқ демократик партиясидан кўрсатилган номзод Ҳотамжон Кетмонов Тошкент вилоятидаги сайловчилар билан учрашди. Бу ҳақда Ўзбекистон ХДП Марказий кенгаши матбуот хизмати маълум қилди.
Учрашув бир вақтнинг ўзида онлайн видео-конференция шаклида Тошкент вилоятининг барча туман ва шаҳарларидаги олти мингга яқин сайловчини қамраб олди.
Мазкур учрашувда даставвал номзоднинг ишончли вакили Ҳотамжон Кетмоновнинг таржимаи ҳоли билан йиғилганларни таништирди. Шундан сўнг, сўз Ўзбекистон Республикаси Президентлигига номзод – Ҳотамжон Абдураҳманович Кетмоновга берилди.
Ҳотамжон Кетмонов ўз чиқишида сайлов – халқнинг хоҳиш-иродасини рўёбга чиқаришнинг олий ифодаси, давлат ҳокимияти органларини демократик тарзда ташкил этишнинг асоси эканини алоҳида таъкидлаб, ўзи илгари сураётган сайловолди дастурининг мазмун-моҳияти ҳақида қуйидагиларни айтиб ўтди:
– Дастур Ўзбекистон Халқ демократик партияси фракциясининг Парламентдаги кўпчилик – демократик кучлар Блокига нисбатан ўзини мухолифат деб эълон қилгани, бунинг натижасида мухолиф фракция сифатида илгари сурган қатор ғояларга асосланишини ҳамда мамлакатнинг ижтимоий йўналтирилган бозор иқтисодиёти асосида ўсиб бораётган иқтисодий салоҳиятидан келиб чиқиб, аҳолининг барча қатламлари, энг аввало, кам таъминланган қатламининг турмуш даражасини яхшилашга қаратилган кучли ижтимоий сиёсатни амалга оширишда давлатнинг тартибга солувчанлик ролини мустаҳкамлаш, энг кам истеъмол харажатлари (истеъмол саватчаси) стандартларини белгилашнинг асосланган ва замонавий механизмларини ишлаб чиқиш ҳамда жорий қилиш, аҳолига коммунал хизматлар кўрсатиш тарифларининг давлат томонидан тартибга солинишини такомиллаштириш орқали коммунал хизматлар нархларини мақбуллаштириш, аҳоли бандлигини таъминлашнинг мутлақо янги ва замонавий усулларини жорий қилиш, иш ўринларини ташкил этиш дастурининг сўзсиз бажарилиши устидан парламент назоратини кучайтириш, муҳим ижтимоий-иқтисодий дастурларнинг асосий мезони уларни ҳаётга татбиқ қилиш орқали яратиладиган барқарор иш ўринлари сони билан ўрта махсус ва олий таълим муассасаларининг битирувчиларини ишга жойлаштиришнинг ўзаро боғлиқлигини таъминлаш масалаларидир.
Учрашув давомида номзод маърузаси бўйича бир қатор иштирокчилар сўзга чиқди.
Учрашув сўнгида сайловчилар ўзларини қизиқтирган саволларга номзод ва унинг ишончли вакилларидан атрофлича жавоб олиш имконига эга бўлди.
Изоҳ (0)