Марказий сайлов комиссиясида Европада Хавфсизлик ва ҳамкорлик ташкилоти (ЕХҲТ) Демократик институтлар ва инсон ҳуқуқлари бўйича бюроси (ДИИҲБ)нинг Ўзбекистон Республикаси Президенти сайловни кузатиш бўйича миссияси раҳбари Петер Трауготт Тейлер бошчилигидаги кузатувчилар миссияси вакиллари билан учрашув бўлиб ўтди. Бу ҳақда Ўзбекистон Республикаси Президенти сайловини ёритиш бўйича Республика матбуот маркази хабар берди.
Марказий сайлов комиссияси раиси М.Абдусаломов Комиссиянинг ЕХҲТ ДИИҲБ билан ҳамкорлиги самарали ривожланиб бораётгани ва ўзининг ижобий натижаларини бераётганини таъкидлади. ЕХҲТ ДИИҲБ расмий веб-сайтида жорий йилнинг 21 октябрида эълон қилинган ҳисоботида айтилганидек, сайлов компаниясининг барча босқичлари қонунда белгиланган муддатларда ва тартибда Марказий сайлов комиссияси томонидан тасдиқланган Ўзбекистон Республикаси Президенти сайловига тайёргарлик кўриш ва уни ўтказиш бўйича асосий тадбирлар дастури доирасида амалга оширилмоқда.
Ҳисоботда 2015 йилнинг март ойида ўтказилган президентлик сайлови якунларига кўра шу йилнинг декабрь ойидаёқ «Марказий сайлов комиссияси тўғрисида»ги, «Ўзбекистон Республикаси Президенти сайлови тўғрисида»ги қонунларга ҳамда бошқа қонун ҳужжатларига ўзгартириш ва қўшимчалар киритилганлиги ижобий баҳоланди.
Учрашувда ЕХҲТ ДИИҲБ миссияси фаолиятини, унинг Ўзбекистонда сайловни кузатиш бўйича Марказий сайлов комиссияси билан ўзаро ҳамкорлигини ташкил этиш масалалари хусусида атрофлича фикр алмашилди.
Таъкидлаш лозимки, Бюронинг сайловни кузатиш бўйича миссияси таркибига асосий гуруҳ билан бирга 20 нафар узоқ муддатли кузатувчилар, шунингдек овоз бериш куни сайлов участкаларида кузатувни амалга оширадиган 250 нафар қисқа муддатли кузатувчилар киритилган.
Ўзбекистонга келиши 5 ноябрга режалаштирилган узоқ муддатли кузатувчиларнинг вазифалари сайлов жараёнининг турли босқичларини минтақаларда кузатиш ва миссия иштирокчиларига мамлакатда нима бўлаётганлиги ҳақида тўлақонли ахборот тақдим қилишдан иборат. Узоқ муддатли кузатувчиларнинг фаолияти ДИИҲБга минтақалардаги кузатув натижаларини инобатга олган ҳолда сайлов жараёни ҳақида тўлалигича ҳисобот тузиш имконини беради.
Қисқа муддатли кузатувчиларнинг вазифалари уларга бириктирилган ҳудудда сайлов куни кузатувни амалга ошириш, шунингдек ўз хулосалари ҳақида аниқ ва тўлалигича миссиянинг бош қароргоҳига хабар беришдан иборатдир. Етарли миқдорда қисқа муддатли кузатувчиларни жойлаштириш ДИИҲБга бутун мамлакат бўйича статистик жиҳатдан кўпроқ сайлов участкаларини қамраб олиш имконини беради. Қисқа муддатли кузатувчиларнинг мамлакатда жорий йилнинг 2 декабридан 6 декабригача фаолият юритиши назарда тутилган.
Таъкидлаш лозимки, сайловни кузатиш бўйича тўлақонли миссия Марказий сайлов комиссиясининг таклифига биноан ҳамда мамлакат халқаро стандартларга мувофиқ мазкур муҳим сиёсий тадбирни очиқ ва ошкора ўтказишга тайёрлигини эътиборга олиб илк маротаба Ўзбекистонга юборилмоқда.
Изоҳ (0)