Bugun, 2-noyabr kuni O‘rtachirchiq tumanidagi Toshkent viloyat ma’naviyat-ma’rifat markazi majlislar zalida O‘zbekiston Respublikasi prezidentligiga O‘zbekiston Xalq demokratik partiyasidan ko‘rsatilgan nomzod Hotamjon Ketmonov Toshkent viloyatidagi saylovchilar bilan uchrashdi. Bu haqda O‘zbekiston XDP Markaziy kengashi matbuot xizmati ma’lum qildi.
Uchrashuv bir vaqtning o‘zida onlayn video-konferensiya shaklida Toshkent viloyatining barcha tuman va shaharlaridagi olti mingga yaqin saylovchini qamrab oldi.
Mazkur uchrashuvda dastavval nomzodning ishonchli vakili Hotamjon Ketmonovning tarjimai holi bilan yig‘ilganlarni tanishtirdi. Shundan so‘ng, so‘z O‘zbekiston Respublikasi Prezidentligiga nomzod – Hotamjon Abdurahmanovich Ketmonovga berildi.
Hotamjon Ketmonov o‘z chiqishida saylov – xalqning xohish-irodasini ro‘yobga chiqarishning oliy ifodasi, davlat hokimiyati organlarini demokratik tarzda tashkil etishning asosi ekanini alohida ta’kidlab, o‘zi ilgari surayotgan saylovoldi dasturining mazmun-mohiyati haqida quyidagilarni aytib o‘tdi:
– Dastur O‘zbekiston Xalq demokratik partiyasi fraksiyasining Parlamentdagi ko‘pchilik – demokratik kuchlar Blokiga nisbatan o‘zini muxolifat deb e’lon qilgani, buning natijasida muxolif fraksiya sifatida ilgari surgan qator g‘oyalarga asoslanishini hamda mamlakatning ijtimoiy yo‘naltirilgan bozor iqtisodiyoti asosida o‘sib borayotgan iqtisodiy salohiyatidan kelib chiqib, aholining barcha qatlamlari, eng avvalo, kam ta’minlangan qatlamining turmush darajasini yaxshilashga qaratilgan kuchli ijtimoiy siyosatni amalga oshirishda davlatning tartibga soluvchanlik rolini mustahkamlash, eng kam iste’mol xarajatlari (iste’mol savatchasi) standartlarini belgilashning asoslangan va zamonaviy mexanizmlarini ishlab chiqish hamda joriy qilish, aholiga kommunal xizmatlar ko‘rsatish tariflarining davlat tomonidan tartibga solinishini takomillashtirish orqali kommunal xizmatlar narxlarini maqbullashtirish, aholi bandligini ta’minlashning mutlaqo yangi va zamonaviy usullarini joriy qilish, ish o‘rinlarini tashkil etish dasturining so‘zsiz bajarilishi ustidan parlament nazoratini kuchaytirish, muhim ijtimoiy-iqtisodiy dasturlarning asosiy mezoni ularni hayotga tatbiq qilish orqali yaratiladigan barqaror ish o‘rinlari soni bilan o‘rta maxsus va oliy ta’lim muassasalarining bitiruvchilarini ishga joylashtirishning o‘zaro bog‘liqligini ta’minlash masalalaridir.
Uchrashuv davomida nomzod ma’ruzasi bo‘yicha bir qator ishtirokchilar so‘zga chiqdi.
Uchrashuv so‘ngida saylovchilar o‘zlarini qiziqtirgan savollarga nomzod va uning ishonchli vakillaridan atroflicha javob olish imkoniga ega bo‘ldi.
Izoh (0)