Facebook компанияси Snapchat’нинг Осиёдаги муқобилини сотиб ололмади

Facebook компанияси Snapchat’нинг Осиёдаги муқобилини сотиб олишга уринди, бироқ дастур муаллифларидан рад жавобини олди. Бу ҳақда «Интерфакс» хабар бермоқда.

Snow номли мобил дастур бир йил аввал пайдо бўлган эди. У худди Snapchat сингари фойдаланувчиларга турли фильтрлар ва ниқобларни таклиф қилади.

Ҳозирги вақтда бу мобил дастур 80 миллион марта юклаб олинган. Бу рақам ҳар ой 10 миллионга ошиб бормоқда.

Мобил дастур эгаси — Жанубий Кореянинг Naver компанияси шу вақтгача ўз маҳсулотини сотиш бўйича бир неча таклиф олган.

Бироқ Япония, Хитой ва Кореяда Snow’нинг нуфузи ошиб бораётганини ҳисобга олиб, барча харидорларга, хусусан, Facebook раҳбари Марк Цукербергга ҳам рад жавобини берган.

The Guardian нашри ҳисоб-китобига кўра, бу Facebook’нинг Snapchat аудиториясини қўлга киритиш йўлидаги ўнинчи уринишидир.

Facebook 2013 йили Snapchat’нинг ўзини 3 миллиард долларга сотиб олмоқчи бўлган, бироқ Snapchat’нинг бош директори Эван Шпигел бу таклифни рад этган.

Ҳозир Snapchat’нинг қиймати 18 миллиард долларга тенг. Facebook’нинг ўз Snapchat’ини яратиш йўлидаги барча уринишлари ҳозирча бесамар кетган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.