Boeing компанияси вертикал ҳолатда ҳавога кўтарилиб-қўнадиган йўловчи самолётни патентлаштирди. Бу ҳақда The Business Insider’га таяниб, «Интерфакс» хабар бермоқда.
Самолёт ҳар бир қанотида вертикал ва горизонтал ҳолатда қайрила оладиган иккита паррак билан жиҳозланган. Вертикал ҳолатда улар ҳавога кўтарилиш ва қўниш учун ишлатилади. Парвоз вақтида эса парраклар горизонтал ҳолатни қабул қилади.
Олинган патентга кўра, янги самолёт тижорат мақсадларида фойдаланилса, камида 100 йўловчини ташиши мумкин бўлади. Ҳаво кемасини, шунингдек, ҳарбий мақсадлар ёки шахсий самолёт сифатида ишлатиш мумкин.
Хабарда қайд этилишича, 2007 йилдан буён ҳарбийлар вертикал ҳолатда ҳавога кўтарилиб-қўнадиган V-22 Osprey самолётидан фойдаланиб келади. Ҳаво кемаси Boeing ва Bell компаниялари ҳамкорлигида қурилган.
Қайд этиш жоиз, сентябрь ойида АҚШ патентлаш ва маҳсулот белгиси бўйича вазирлиги вертикал ҳолатда кўтарилиб-қўнадиган гибрид самолёт устида ишлаётган Airbus компаниясининг патентини рўйхатдан ўтказган эди.