Украина хавфсизлик хизмати 7 май куни президент Владимир Зеленский ва бошқа юқори мартабали амалдорларга нисбатан суиқасд тайёрлаган икки полковникни ҳибсга олди. Бу ҳақда Тhе Kyiv Independent нашри хабар берди.
Манбада айтилишича, хавфсизлик хизмати Украина раҳбарияти вакилларига ҳужум уюштиришни режа қилган бутун бошли тармоқни фош қилган. Ушбу жиноий тармоқ Россия Федерал хавфсизлик хизмати томонидан бошқариб келингани хабар берилган.
Ўтган йилнинг ноябрь ойи охирида Владимир Зеленский The Sun нашрига берган интервьюсида Россиянинг кенг кўламли уруши бошланганидан бери камида бешта суиқасддан омон қолганини маълум қилган эди. Россия суиқасдда Киев ҳарбий маъмурияти аъзоларидан фойдаланишга урингани айтилган.
Манбада айтилишича, ҳужум Россия Федерал хавфсизлик хизматига ишлаган ҳарбийлар — Максим Мишуcтин, Дмитрий Перлин ва Алексей Корневлар томонидан ташкил этилиши керак бўлган.
“Бу суиқасд аслида Россия президенти Владимир Путинга инаугурация маросими учун совға бўлиши керак бўлган. Аммо Россия махфий хизмати муваффақиятсизликка учради”, — дейилади Украина хавфсизлик хизмати раҳбари Васил Малюк ҳисоботида.
Россиянинг суиқасд орқали ўлдиришни режалаштирган шахслар орасида, Владимир Зеленскийдан ташқари Украина хавфсизлик хизмати Васил Малюк ва Украина ҳарбий разведкаси раҳбари Кирилл Буданов ҳам бўлган.
Будановга суиқасд 5 май куни нишонланадиган Пасха байрами олдидан амалга оширилиши режалаштирилган бўлган. Россия агенти Будановнинг ҳаракатларини кузатиб бориши ва маълумотларни Россияга етказиши керак бўлган. Манбада келтирилишича, қўлга олинган полковниклар суиқасдни содир этиши белгиланган Россия агентларини дронлар, ўточар қуроллар ва пиёдаларга қарши миналар билан таъминлаб келган.
Расмийлар тергов жараёни давом этаётганини билдирган. Президент Зеленскийнинг хавфсизлиги юксак даражада таъминлангани айтилган.
Изоҳ (0)