Жанубий Корея терма жамоаси Ўзбекистонга қарши тайёрланиш учун Канада билан ўйнашга қарор қилди

15 ноябрь куни Ўзбекистонга қарши бўлиб ўтадиган ЖЧ—2018 саралаш ўйини олдидан Жанубий Корея терма жамоаси Канадага қарши майдонга тушишни режалаштирди.

«Championat.asia»нинг Жанубий Корея Футбол Ассоциацияси вакилига асосланиб хабар беришича, вақт тиғиз пайтда рақиб топиш осон эмас. Бу пайтда термалар ЖЧ—2018 учун кураш олиб бораётган бўлади. Канада европача ўйин услубида ўйнайди ва бу рақиб Ўзбекистон билан ўйин олдидан муносибдир.

Канадага қарши ўйин 11 ноябрь куни Сеулдан 90 километр узоқликда жойлашган Жеонан стадионида ўтади. Орадан тўрт куни ўтиб эса ўзбекистонликлар Жежу шаҳрида Жанубий Кореяга қарши саф тортади.

Ўз навбатида Ўзбекистон миллий терма жамоаси Жанубий Кореяга қарши ўйин олдидан спаринг рақиб сифатида Иорданияни танлаб олган. Кореяга жўнаб кетиш олдидан Иордания термаси пойтахт Тошкентга ташриф буюради.

Самвел Бабаян бошчилик қиладиган Ўзбекистон миллий терма жамоаси ёзги йиғин доирасида Канадага қарши Австрияда ўйин ўтказган бўлиб, унда рақибига 1:2 ҳисобида имкониятни бой берганди.