АҚШнинг бешта энг йирик газетасидан бири — Los Angeles Times мамлакат президентлигига Демократик партиядан даъвогар Ҳиллари Клинтон номзодини қўллаб-қувватлади. Бу ҳақда, газета чоп этган муҳаррирлик мақоласига асосланиб, «ТАСС» хабар бермоқда.
Газетада қайд қилинишича, собиқ давлат котиби узоқ йиллардан буён президентликка энг яхши тайёргарликка эга номзод бўлиб қолмоқда.
«Биринчи хоним, Нью-Йорк штатидан сенатор ва давлат котиби бўлган пайтлари Ҳиллари Клинтон давлат сиёсатини чуқур ўрганди, шу боис бугунги кунда унинг тегишли масалалар бўйича нуқтаи назари рақибиникидан кўра пухтароқ ўйланган», — дейилади мақолада.
Шу билан бирга, муаллифнинг фикрича, Клинтон хоним буюк президент бўлиши учун ўз нуқсонларини бартараф этиши лозим.
Нашрнинг фикрича, Дональд Трапмнинг президент бўлиб сайланиши АҚШ учун фожиага айланиши мумкин.
Айни пайтда Los Angeles Times томонидан Жанубий Калифорния университети тадқиқот хизмати билан ҳамкорликда ўтказилган тадқиқот натижаларига кўра, Трамп Клинтондан икки фоизга олдинроқ бормоқда. Миллиардерни респондентларнинг 45 фоизи қўллаб-қувватлашини билдирди, собиқ давлат котибининг кўрсаткичи эса 43 фоизга тенг бўлди.