Куз ҳам кириб келди ва ҳозир шу фаслга хос либосларни харид қилишнинг айни вақтидир! Албатта, харидларга киришишдан аввал, бу йилги куз мавсумининг асосий мода тенденциялари билан танишиб олиш фойдадан ҳоли бўлмайди.
Биз қадрли опа-сингилларимиз учун жорий мавсумнинг энг ғаройиб ва кутилмаган трендлари сайланмасини тайёрладик.
Духоба
Духоба кўпчиликка бувижонларимизнинг кўйлакларини ёдга солса-да, бу инжиқ мато жорий кузнинг энг замонавий топилмалари рўйхатида бош бўлиб турибди. Гардеробингиздаги либослар қаторига духобадан тикилган бирор нарса — юбками, нимча ёки пиджакни киритсангиз, кузги кўринишингиздан бир вақтнинг ўзида ҳам кўҳна услублар, ҳам замонавийлик уфуриб туради.
«Эркакча» нарсалар
Бир неча мавсумдан буён эркакларнинг анъанавий аксессуарлари: локланган қора туфли, ботинка, классик кенг шимлар ва йўл-йўл пиджаклар аёллар модаси чўққисида. Улар нафақат замонавий ва универсал кўринишга эга, балки сизнинг назокатингизга (ҳа, айнан аёллик назокатингизга!) ҳам урғу беради.
Йўл-йўл
Йўл-йўл кийимлар, афтидан, сира урфдан қолмаса керак. Бу йил кузда эса ностандарт — ранг-баранг, чалкаш ва асимметрик йўл-йўл либослар урфда. Дидингизга мосини танланг!
Ялтироқ
Ялтироқ либослар куз-қиш мавсумига жуда мос келади (айниқса, байрамона оқшомлар учун). Муҳим жиҳати: кундузи ялтироқ кийимларга бурканишни ҳаддан ошириб юбормай, бирор ялтироқ аксессуар ёки пойабзал билан кифояланган маъқул.
Спорт — бу ҳаёт!
Спорт услубига хос кийимлар салқин куз кунлари учун энг яхши ечим бўла олади. Албатта, кундалик либос сифатида спорт костюми ва кроссовкани танлаш тавсия этилмайди. Энг яхшиси, спортча услубни классика билан уйғунлаштириш керак: джинси, кеда ва кўҳна услубдаги пиджак айниқса жозибали кўриниш ҳосил қилади.
Изоҳ (0)