Швейцария Альпларида вингсьют билан сакраган италиялик экстремал Армин Шмидер ҳалок бўлди. Бу ҳақда «Корреспондент.net» хабар бермоқда.
28 ёшли бейсжампер ўз парвозини Facebook орқали тўғридан-тўғри намойиш қилаётган эди.
«Бугун барча мен билан учади. Лекин сиз фақат эшитиб турасиз. Мен смартфонни чўнтагимга соламан», — деди у парвоз бошида.
Видео бошида вингсьют кийиб олган экстремал сакрашга тайёрланаётгани намойиш этилади. Кейин шамол, қичқириқ ва зарб овози эшитилади.
Парвоз бир дақиқа давом этади, шундан сўнг сукунат қўнғироқлар ва қўйлар овози билан бузилади.
Берн полицияси 28 ёшли эркакнинг танаси топилганини тасдиқлади.