Ўзбекистон ҳукумати электрон ҳукуматнинг идоралараро маълумотлар узатиш тармоғини ташкил этиш чора-тадбирлари тўғрисида қарор (pdf) қабул қилди, деб ёзади «Infocom.uz».
Тармоқ электрон давлат хизматлари кўрсатувчи давлат органлари ва бошқа ташкилотларнинг идоравий ва идоралараро ахборот тизимлари ва ахборот ресурслари ҳамда электрон ҳукумат марказий маълумотлар базаларининг ўзаро ҳамкорлиги соҳасида ягона давлат сиёсатини амалга ошириш мақсадида ташкил этилади.
Ҳужжатга мувофиқ, идоралараро тармоқ 2017 йил 1 январдан бошлаб ишга туширилади. Идоралараро тармоқнинг оператори этиб «Ўзбектелеком» акциядорлик компанияси белгиланди.
«Ўзбектелеком» замонавий ахборот коммуникация технологиялари асосида идоралараро тармоқни ташкил этиб, унинг узлуксиз ишлашини ва янада ривожлантирилишини таъминлаши керак.
Компания, шунингдек, идоралараро тармоқ орқали ўзаро электрон ҳамкорликни амалга оширишда ахборот хавфсизлигини ва маълумотлар ҳимоя қилинишини таъминлайди.
Изоҳ (0)