ОАВ: Хитой шарқида ЙТҲ оқибатида 10 киши ҳалок бўлди

Хитой шарқидаги Шаньдун провинциясида бир нечта автомобиль иштирокида рўй берган йўл-транспорт ҳодисаси оқибатида 10 киши ҳалок бўлди, яна 20 нафари жабрланди. Бу ҳақда «Синьхуа» агентлигига таяниб, «ТАСС» хабар бермоқда.

Ҳодиса ҳудуднинг марказий қисмидаги Цзибо округида юз берди. Маҳаллий расмийларнинг маълум қилишича, йўл-транспорт ҳодисаси юк машинаси, иккита автобус, енгил автомобиль ва мотоцикл иштирокида бўлди.

Барча жабрланганлар шифохонага етказилди, улардан икки нафари оғир аҳволда экани хабар қилинмоқда.

Полиция ходимлари воқеа юзасидан суриштирув ишларини бошлади.