ОАВ: Туркиядаги тўнтариш муваффақиятли амалга ошганда генерал Ўзтурк мамлакат президенти лавозимини эгалларди

Туркиядаги ҳарбий тўнтариш ташкилотчилари режалари муваффақиятли амалга ошганда ҳарбий-ҳаво кучлари қўмондони генерал Акин Ўзтуркни мамлакат президенти этиб тайинлашни мўлжаллаган. Бу ҳақда тергов хулосаларига таяниб, Hurriyet маълум қилди, дея хабар беради «Газета.ru».

Нашрга кўра, исёнчиларнинг режалари Туркия бош штаби раҳбари Хулуси Акарнинг фаол аралашуви туфайли барбод бўлган. Терговнинг аниқлашича, фитначилар муваффақият қозонган тақдирда Акар ўз вазифасини бажаришда давом этиши, унинг ўринбосари лавозимини эса генерал Мехмет Дишли эгаллаши мумкин эди. 

Ҳарбий тўнтаришни ташкиллаштирганини тан олган генерал Акин Ўзтурк олдинроқ ўз кўрсатмаларида Хулуси Акар билан тил бириктирганини маълум қилганди.