Ўзбекистонда 2017 йилгача жисмоний ва юридик шахсларга тегишли бўлган кўчмас мулк объектлари ялпи хатловдан ўтказилади, дея хабар бермоқда «Газета.uz» ҳукуматнинг 3 августдаги қарори (pdf)га таяниб.
Ҳужжатда таъкидланишича, хатловдан мақсад кадастр ҳисобига олишни такомиллаштириш, жисмоний ва юридик шахсларга тегишли бўлган кўчмас мулк объектларидан фойдаланганлик учун асосланган солиқ солинишини таъминлаш ва бошқалардан иборат.
Шунингдек, бу «Электрон ҳукумат» тизими доирасида «Кадастр ва кўчмас мулкни рўйхатга олиш тизимларини модернизация қилиш» лойиҳасини амалга ошириш учун ҳам зарурдир.
Ўтказилган хатлов натижалари бўйича туман (шаҳар) давлат солиқ хизмати органларига жисмоний ва юридик шахсларга тегишли бўлган кўчмас мулк объектлари тўғрисида ахборот берилади.
Хатлов давомида ер участкалари, бинолар, иншоотлар ва кўп йиллик дарахтзорларнинг эгалари, улардан фойдаланувчилар, ижарачилари ва мулкдорлари, ўзбошимчалик билан эгалланган ва қурилган иморатлар аниқланади.
Ишчи гуруҳ хатлов жараёнида кўчмас мулк объектларини текшириш, ер участкасини суратга олиш, бино ва иншоотларнинг ташқи ва ички ўлчамларини ўлчаш ҳуқуқига эга.