Ҳиндистон шимолидаги Уттар-Прадеш штатининг Маинпури шаҳрида оломон полиция идорасини яксон қилиб, ҳуқуқ-тартибот ходимларини калтаклади. Воқеа юзасидан текширув бошланди, деб хабар беради «ТАСС».
Шаҳар аҳолисининг сўзларига қараганда, полициячилар тиркамали тракторда ғишт олиб кетаётган ишчиларни ушлаб қолиб, улардан 100 рупиядан (2 доллар) пора талаб қилган. Ишчилар пора беришдан бош тортгач, полициячилар уларни калтаклай бошлаган, бунинг оқибатида икки ишчи оламдан ўтган. Ҳуқуқ-тартиботчилар ўликларни ҳовузга ташлаб юборган. Ўликларни топиб олган маҳаллий аҳоли вакиллари ғазабланиб, полиция идорасини қўлга олган ва у ердаги ходимларни дўппослаган.
Маҳаллий ҳокимият шаҳарга қўшимча кучларни киритиб, вазиятни назоратга олган.
Маълум бўлишича, полиция мунтазам равишда ишчилардан ўлпон ундириб келган.
Изоҳ (0)