«Насаф»нинг собиқ футболчиси Шоҳрух Гадоев Баҳрайндаги фаолиятини якунлаб, «Бунёдкор» билан шартнома тузди

Қаршининг «Насаф» клубидаги ўйинлари орқали футбол мухлисларига яхши таниш бўлган Шоҳрух Гадоевни Тошкентнинг «Бунёдкор» клуби ўз сафига қўшиб олди. Бу ҳақда «қалдирғочлар» матбуот хизмати хабар берди.

Шоҳрух Гадоев сўнгги 5 ойни Баҳрайннинг «Ал-Муҳаррақ» клубида ўтказиб, 13 та ўйинда 2 та гол уришга муваффақ бўлганди. Олий Лига иккинчи даврасидан эътиборан у «Бунёдкор» шарафини 23-рақамда ҳимоя қилади.

1991 йилда таваллуд топган футболчи 2012 йил «Насаф» сафида 15 та ўйин ўтказган. 2013 йил эса 14 та ўйинда 3 та гол урган. 2014 йилнинг катта қисмини жароҳати сабаб ўтказиб юборган футболчи 7 та ўйинда иштирок этган. 2015 йил эса 27 та ўйинда 5 та гол урганди.

Ўзбекистон миллий терма жамоасини Миржалол Қосимов бошқарганида Гадоев бош жамоадан чақирув қоғози олиб турган.