ФВВ Сирғали бозорида махсус-тактик ўқув машқи ўтказди
Тошкентнинг Сирғали туманида жойлашган автомобиль ва эҳтиёт қисмлар бозорида «Зилзила ва ёнғин содир бўлганда фуқароларни қутқариш, биринчи тиббий ёрдам кўрсатиш ҳамда уларни хавфсиз ҳудудга эвакуация қилиш ишларини ташкил этишда объект раҳбарияти ва фуқаро муҳофазаси тузилмалари ҳаракатлари» мавзусида махсус-тактик ўқув машқи ўтказилди. Бу ҳақда Фавқулодда вазиятлар вазирлиги матбуот хизмати хабар бермоқда.
Махсус-тактик ўқув машқининг назарий босқичида иштирокчиларга тадбир ўтказилиш мақсади бўйича тушунчалар берилди. Объект раҳбари ва ўқув машқини ўтказиш штаби аъзоларининг ахборотлари тингланди. Амалий босқичда мавжуд ўқув нуқталарида ФВДТ хизматлари ва объект фуқаро муҳофазаси тузилмаларининг ҳаракатлари амалга оширилди.
Ўқув машқи ғоясига кўра шартли равишда зилзила содир бўлиши натижасида маъмурий бинода ёнғин содир бўлади. Бинодаги ходимлар ва моддий-товар бойликлар, шунингдек, автотураргоҳдаги аҳоли ҳамда автомашиналар хавфсиз ҳудудга кўчирилди ва ёнғин бартараф этилди.
Тадбир якунида иштирокчиларга Тошкент шаҳар фавқулодда вазиятлар бошқармаси қутқарув отрядининг замонавий асбоб-анжомлари кўргазмаси намойиш этилди.
