Футбол бўйича Саудия Арабистони Суперкубоги учун ўйин иккинчи бор Англияда бўлиб ўтади

«Ал-Аҳли» ҳамда «Ал-Ҳилол» клублари ўртасидаги Саудия Арабистони Суперкубоги «Фулҳем»нинг уй стадиони бўлмиш «Кревен Коттеж»да бўлиб ўтади. Беллашув 8 август санасига тайин қилинган.

«Championat.asia» маълумотига кўра, бир йил муқаддам саудияликлар Суперкубок учрашувини «КПР» футбол клубига тегишли бўлган «Лофтус Роад»да ўтказган бўлиб, ўшанда «Ан-Наср» ва «Ал-Ҳилол» клублари ғолиблик учун кураш олиб борган.

«Фулҳем» майдонига чиқиб келадиган «Ал-Аҳли» Осиё Чемпионлар Лигасининг 2016 йилги мавсумида «Насаф» билан бир гуруҳдан жой олганди. Жиддадаги ўйинда Саудия клуби 2:1 ҳисобида зафар қучган, Қаршида эса «Насаф» шу ҳисобда устун келган.

«Ал-Ҳилол» эса Тошкентнинг «Пахтакор» клуби билан кураш олиб борди. Биринчи учрашувда 2:2 ҳисоби қайд этилган бўлса, Ар-Риёдда Саудия жамоаси 4:1 ҳисобида зафар қучганди.