Apple ва Samsung учун чиплар ишлаб чиқарувчи Британия компанияси 32 млрд долларга сотилиши маълум қилинди

Япониянинг SoftBank телекоммуникация гуруҳи Буюк Британиянинг мобил қурилмалар учун процессорлар ишлаб чиқарувчи ARM Holdings компаниясини 100% акцияларини сотиб олмоқда. Келишувнинг умумий суммаси 24,3 миллиард фунт стерлингни (32 миллиард доллар) ташкил этди. Бу ҳақда «РБК» хабар бермоқда.

ARM Лондон биржаси савдоларида иштирок этадиган технологик компаниялар орасида қиймати энг юқориси бўлиб, Samsung, Huawei ва Apple ўз қурилмаларида унинг процессорларидан фойдаланади.

2016 йилнинг учинчи чорагида якунига етиши кўзда тутилган келишувга изоҳ берган Буюк Британия молия вазири Филип Хэммонд мамлакат Евроиттифоқдан чиқиш ҳақида қарор қабул қилинган референдумдан кейин ҳам халқаро инвесторлар учун жозибадорлигини йўқотмаганини таъкидлади.