Эрдўғон Назарбоевга Россия билан муносабатлар изга тушишига қўшган ҳиссаси учун миннатдорлик билдирди
Туркия президенти Ражаб Тоййиб Эрдўғон телефон орқали мулоқот чоғида қозоғистонлик ҳамкасби Нурсултон Назарбоевга Россия билан муносабатлар изга тушишига қўшган ҳиссаси учун миннатдорлик билдирди. Суҳбат турк томони ташаббуси билан бўлиб ўтгани билдирилмоқда, дея хабар беради «ТАСС».
«Туркия президенти Қозоғистон раҳбарини Туркия ва Россия ўртасида барча йўналишлардаги муносабатлар йўлга қўйилишига қўшган бебаҳо ҳиссаси ва салмоқли меҳнати учун самимий миннатдорлик билдирди. Россия президенти Владимир Путин билан бўлиб ўтган суҳбати ҳақида маълум қилди ва Анқара ҳамда Москва яқинлашувига қаратилган барча ҳаракатлар рўёбга чиқишига умид билдирди», — дея таъкидлаган Қозоғистон президенти матбуот хизмати.
Матбуот хизматига кўра, Эрдўғон Қозоғистон президентига яқин орада Туркияга ташриф билан келишни таклиф этган.
