Ўзбекистонда хавфли гидрометеорологик ва геологик ҳодисалар билан боғлиқ фавқулодда вазиятлар олдини олиш бўйича профилактика ишлари олиб борилмоқда. Бу ҳақда Фавқулодда вазиятлар вазирлигига таяниб, «Туркистон-пресс» агентлиги хабар берди, деб ёзади «Газета.uz».
ФВВ, Ўзгидромет ва Давлат геология қўмитасининг ҳудудий бўлинмалари вилоят ҳокимиятлари билан бирга сел, тошқин ва ўпирилиш ҳодисалари рўй бериши мумкин бўлган ҳудудларни ўрганиб чиқди. Дарё ўзанларини тозалаш, қирғоқларни мустаҳкамлаш ҳамда бошқа муҳандислик-техник ва ҳимоя ишлари бўйича тадбирлар режаси ишлаб чиқилди. Уларни амалга ошириш учун 23 миллиард сўмга яқин маблағ ажратилди.
Хавфли табиат ҳодисаларининг оғир оқибатлари олдини олиш, улар содир бўлган тақдирда аҳолини тегишлича ҳаракат қилишга ўргатиш учун ФВВ Фуқаролар ҳимояси институти йил бошидан буён вазирликлар, муассаса ва ташкилотлар раҳбарияти таркибидан 730 дан ортиқ кишини ўқитди.
113,86 минг фуқаро учун 2500 дан зиёд машғулотлар ўтказилди. Аҳолини об-ҳавонинг кескин ўзгаришлари ҳақида ўз вақтида огоҳлантириш учун уяли алоқа абонентларига 70 дан ошиқ SMS-хабарлар жўнатилди.
Изоҳ (0)