«Барселона» жамоаси футболчиси, солиқ тўлашдан бўйин товлашда айбланиб суд олдида жавоб бераётган Лионель Месси молиявий фирибгарликлар ҳақида ҳеч нарса билмаганини ва фақат футбол ўйнашга эътибор қаратганини таъкидлаб ўтди. Бу ҳақда «ТАСС» хабар бермоқда.
Аргентиналик спортчи ва унинг отаси 4,1 миллион евро миқдоридаги солиқни тўлашдан бўйин товлашда айбланмоқда. Судда футболчи, шунингдек, отаси Хорхе Орасио Мессига ишонганини ва солиқ масаласини у билан муҳокама қилмаганини айтиб ўтди.
«Мен турли ҳомийлар билан шартномалар имзолаётганимизни, улар эълонларда қатнашганим, суратга тушганим ва ҳоказолар учун муайян сумма тўлашини билардим, лекин пуллар қаерга кетгани ҳақида тасаввурим йўқ», — деди у.
Прокурор келтирган маълумотларга қараганда, футболчи 2007, 2008 ва 2009 йилларда олинган даромаддан солиқ тўламаган. Форвард Испания ғазнасига 10 миллион евро тўлаб, унга қарши очилган иш ёпилиши учун яна 15 миллион евро тўлашга тайёрлигини билдирган, аммо расмийлардан рад жавоби олган эди.
Суд жараёнида аниқлаштирилиши лозим бўлган масала — Мессини жиноий жавобгарликка тортиш ёки тортмаслик. Айблов уни 22 ойга озодликдан маҳрум қилишни сўрамоқда. Аммо, маҳаллий қонунчиликка мувофиқ, жавобгар биринчи марта жиноят содир этаётган бўлса, унга белгиланган муддат икки йилдан ошмаса, у жазони қамоқда ўташдан озод қилиниши мумкин.
Изоҳ (0)