Андижонда «Ёшлар чекишга қарши!» шиори остида акциялар ташкил этилди

Ёшлар ўртасида соғлом турмуш тарзини тарғиб қилиш, ёш авлод соғлигини муҳофаза этиш, улар орасида тамаки чекиш, ичкиликбозлик, ОИВ/ОИТС ва гиёҳвандликни олдини олиш мақсадида ҳамда 31 май – «Бутунжаҳон тамаки чекишга қарши кураш куни» муносабати билан Андижон вилоятидаги барча таълим муассасаларида, маҳалла ва гузарларда, аҳоли гавжум жойларда «Ёшлар чекишга қарши!» шиори остида акциялар ташкил этилди. Бу ҳақда «Камолот» ёшлар ижтимоий ҳаракатининг Андижон вилоят Кенгаши матбуот хизмати «Дарё»га маълум қилди.

Акция доирасида тамаки ва алкоголь маҳсулотлари сотиладиган дўконларда «Виждонли сотувчи», «Яшашни истасанг чекишни ташла!», «Нафас олишимга халақит берма!», «Фарзандларинг соғлом бўлишини истайсанми?... Унда чекишни ташла» каби мавзуларда «Саломатлик посбонлари» кўнгилли ёшлар гуруҳининг тарғиботчи ёшлари томонидан тарғибот тадбирлари амалга оширилди.

Шунингдек, турли йўналишдаги такси ва жамоат транспортларга «20+ Бу қонун!», «Ёшлар чекишга қарши!» каби мавзуларда информацион стикерлар жойлаштирилди.