«Милан»нинг собиқ ярим ҳимоячиси Звонимир Бобан ФИФА бош котиби ўринбосари этиб тайинланди

Футбол бўйича Хорватия терма жамоаси ҳамда Италиянинг «Милан» клуби собиқ ярим ҳимоячиси Звонимир Бобан Халқаро футбол федерацияси (ФИФА) бош котиби ўринбосари этиб тайинланди. Бу ҳақда Reuters агентлигига асосланиб, «Чемпионат» хабар бермоқда.

13 май куни ФИФА бош котиблигига ташкилот тарихида биринчи марта аёл киши – сенегаллик Фатма Самура тайинланган эди.

Звонимир Бобан ФИФА маъмуриятининг футбол қисми — футболни ривожлантириш ва мусобақаларни ташкил этиш билан шуғулланади. Бунгача 47 ёшли хорватиялик мутахассис ташкилот президенти Жанни Инфантино маслаҳатчиси лавозимида фаолият олиб борганди.

Шунингдек, ФИФА бош котибининг яна бир ўринбосари этиб Марко Виллигер тайинланди. У тижорат ва маъмурий операцияларни назорат қилади.

Эслатиб ўтамиз, аввалроқ ФИФА бош котиби ўринбосари лавозимида ишлаган Маркус Каттнер қоидабузарлик учун ишдан бўшатилган эди.