Ўтган ҳафтада Ўзбекистонда юз берган ёнғинларда 2 киши ҳалок бўлди

Ўтган ҳафта мобайнида Ўзбекистон ҳудудида 127 та ёнғин қайд этилди. Турли сабабларга кўра содир бўлган ёнғинларда икки нафар фуқаро тан жароҳати олган ва икки нафар фуқаро ҳалок бўлган. Бу ҳақда Ўзбекистон Республикаси ИИВ Ёнғин Хавфсизлиги Бош бошқармаси матбуот хизмати хабар бермоқда.

Ушбу ёнғинларда 275 миллион сўмдан ортиқ қурилиш конструкциялари ва 280 миллион сўмга яқин моддий бойликлар ёнғиндан сақлаб қолинган.

Қашқадарё вилояти Чироқчи туманида яшовчи фуқаро Ш.Муродовнинг уйида қозонда пахта ёғини доғлаш учун газ плитасига қўйиб, уни назоратсиз қолдириши натижасида ёнғин содир бўлган. Ёнғиндан уйнинг 12 квадрат метр майдонда шифт қисми ёниб зарарланган ҳамда уй эгасининг турмуш ўртоғи, ўғли ва қизи куйиш тан жароҳати олиб шифохонага ётқизилган.

Фарғона вилояти Қува туманида яшовчи фуқаро Б.Ҳошимовнинг уйида электр симларнинг қисқа туташуви натижасида ёнғин содир бўлиб, уйнинг 80 квадрат метр майдонда томи ва шифт қисми ёниб зарарланган.

Хоразм вилояти Хонқа туманида яшовчи фуқаро Ж.Мақсудовнинг молхонасида электр симларнинг қисқа туташуви натижасида ёнғин содир бўлиб, молхонанинг 65 квадрат метр майдонда ҳамда қўшниси молхонасининг 20 квадрат метр майдонда том қисми ва ғамлаб қўйилган хашаклари ёниб зарарланган.

Бошқарма бундай ҳолатларга йўл қўймаслик учун ёнғин хавфсизлиги талабларини ёддан чиқармасликка чақирмоқда.