Ўзбекистонлик Ҳумоюн Султонов Италиянинг Санта Маргарита Ди Пула шаҳрида ўтказилаётган ITF туркумига кирувчи, мукофот жамғармаси 10 минг долларга тенг теннис турниридаги иштирокини якунлади.
Халқаро теннис федерациясининг маълум қилишича, 17 ёшли ўзбекистонлик теннисчи яккалик баҳслари иккинчи даврасида норвегиялик Каспер Руудга қарши кортга чиқди. Икки ярим соат давом этган муросасиз баҳсда 5:7, 6:2, 6:1 ҳисобида норвегиялик теннисчи зафар қучди.
Дастлабки даврада Ўзбекистон вакили германиялик Бенжамин Лоччисанога қарши баҳс олиб борганди. Биринчи сетни 1:6 ҳисобида бой берган германиялик теннисчиси иккинчи сетнинг тўртинчи геймидан сўнг баҳсни давом эттира олмаслигини маълум қилган эди.
Шунингдек, британиялик Жей Кларк билан тандем ҳосил қилган Султонов жуфтликлар баҳси илк даврасида аргентиналик Томас Жерини ҳамда италиялик Пьерданио Ло Приоре дуэтини 6:3, 4:6, 10:5 ҳисобида мағлубиятга учратиб чорак финалга чиққан эди. Чорак финалда Султонов/Кларк жуфтлиги италиялик Андреа Бассо ва Франческо Монкагатто дуэтига 0:6, 7:6, 5:10 ҳисобида имкониятни бой берди.