Саудия Арабистонида ҳаж саноати муҳимлик бўйича нефть секторидан кейинги ўринни эгаллайди, бироқ қироллик нефть нархи тушиши муносабати билан, унинг тузилмасини ўзгартириб, уни етакчи секторга айлантирмоқчи. Бу ҳақда бугун, 24 март куни Saudi Gazette хабар берди, деб ёзади «РИА Новости».
«Иқтисодчилар ҳажни қироллик иқтисодиётининг катта ўсиш потенциалига эга бўлган муҳим сектори деб билмоқда. Уни ривожлантириш орқали ёш эркак ва аёлларнинг ишга жойлашуви бўйича катта имкониятлар юзага келади. Сайёҳлик миллий қўмитаси аъзоси Абдул Ғани ал-Ансарий сектор келажакда миллий иқтисодиётга асосий ҳисса қўшиши учун, уни реструктуризация қилиш заруриятини таъкидлади», — дейилади мақолада.
Сайёҳлик сектори йилига қарийб 85 миллиард Саудия риали ҳажмида даромад келтиради, шундан 45 миллиарди ҳаж ҳиссасига тўғри келади. Ҳар йили Саудия Арабистони 2 миллион зиёратчини қабул қилади, бу 100 мингга яқин ишчи ўринлари яратилишига имкон беради.
Айни пайтда Маккада масжидни кенгайтириш ишлари олиб борилаётгани туфайли, ҳаждан келадиган даромадлар бироз камайди. Аммо қироллик ҳукумати реконструкция якунлангач, ҳаж зиёрати 57 миллиард риал даромад келтиришини кутмоқда, умуман, яқин бир неча йил ичида сайёҳлик сектори 35 миллиард риалга ошиши кўзда тутилган.
Шунга қарамай, Макка ва Мадинадаги зиёратчилар сони ўртасидаги катта фарқ ҳам яна бир муаммо ҳисобланади. Макка бир вақтнинг ўзида 12 миллиондан зиёд кишини сиғдира олса, Мадина атиги 230 минг кишини қабул қила олади.
Изоҳ (0)