Америкалик ҳарбийлар ҳамда Океан ва атмосферани ўрганиш бўйича АҚШ миллий бошқармаси (NОАА) ходимлари ХХ асрнинг денгиз тарихи билан боғлиқ сирни очишга муваффақ бўлди, деб ёзади «ТАСС». Улар 95 йил аввал изсиз йўқолган «Конестога» (USS Conestoga) ҳарбий шатакчи кемасини топди.
Аслида ушбу кема қолдиқлари 2009 йилдаёқ Сан-Франциско қирғоқлари яқинида Фараллон оролларидан 5 км масофада 57 метр чуқурликдан топилган, бироқ ўшанда тадқиқотчилар чўкиб кетган номаълум кемани аниқладик, деб ўйлаган эди.
2014 йилда мутахассислар аввалроқ топилган чўкиб кетган кемаларни ўрганишни бошлади. 2015 йил октябрида улар «Конестога»нинг йўналиши Фараллон ороллари яқинидан ўтганини аниқлади. Кема ҳалокатга учраган ҳудуд чуқур сув остига камералар тушириб ўрганилди. Олинган кадрларда кемага жиддий шикаст етмагани, аммо унинг корпуси коррозиядан анча зарарланганини кўриш мумкин.
Тадқиқот якунларига кўра, океаншунослар ва уларга ёрдам берган ҳарбийлар чўкиб кетган кема «Конестога» деган хулосага келди.
Ушбу шатакчи кема АҚШ ҳарбий-денгиз кучлари томонидан 1917 йилда сотиб олинган. У 1921 йилда Мар-Айленддаги ҳарбий-денгиз базасидан Гавайидаги Пёрл-Харборга отланган, ўшандан буён «Конестога» ва унинг 56 нафар экипажининг тақдири номаълум бўлиб келган.
Изоҳ (0)