Давлат солиқ хизмати органлари томонидан тегишли идоралар билан ҳамкорликда ўтказилаётган назорат тадбирлари ноқонуний равишда киракашлик фаолияти билан шуғулланишнинг олдини олишга хизмат қилмоқда. Бу ҳақда Давлат солиқ қўмитаси ахборот хизмати хабар беради.
Жумладан, Боғот туманида яшовчи фуқаро Комилжон Маткаримов муқаддам шундай ҳуқуқбузарлик, яъни ноқонуний равишда аҳолига пуллик транспорт хизмати кўрсатганлиги сабабли маъмурий жавобгарликка тортилган бўлишига қарамасдан, ҳеч қандай ҳужжатсиз, белгиланган тартибда лицензия олмасдан, такроран аҳолига пуллик транспорт хизмати кўрсатиб юрганлиги аниқланган.
Мазкур ҳолат юзасидан фуқаро К.Маткаримовга нисбатан Ўзбекистон Республикаси Жиноят кодексининг 190-моддаси 1-қисми билан жиноий иш қўзғатилган.
Жиноят ишлари бўйича Боғот тумани судининг 2015 йил 18 ноябрдаги ҳукми билан фуқаро К.Маткаримовга нисбатан ҳар ойлик иш ҳақининг 20 фоизи миқдорини давлат даромади ҳисобига ушлаб қолган ҳолда бир йил муддатга ахлоқ тузатиш иши жазоси тайинланган.
Бундан ташқари, Ҳазорасп туманида яшовчи фуқаро Отабек Матёқубов юқоридаги каби ҳуқуқбузарликни содир этганлиги учун унга нисбатан ҳам жиноий иш қўзғатилган. Жиноят ишлари бўйича Ҳазорасп тумани судининг 2016 йил 22 февралдаги ҳукми билан фуқаро О.Матёқубовга нисбатан ҳар ойлик иш ҳақининг 20 фоизи миқдорини давлат даромади ҳисобига ушлаб қолган ҳолда 1 йил муддатга ахлоқ тузатиш иши жазоси тайинланган.
Изоҳ (0)