Наврўз байрамида Тошкентнинг айрим кўчаларида транспорт воситалари ҳаракати чекланиши маълум қилинди

Тошкент шаҳар ҳокимининг жорий йил 18 мартида имзоланган 244-сонли қарорига кўра, Наврўз  байрамини ўтказиш вақтида йўлларда ҳаракатланиш хавфсизлигини таъминлаш мақсадида бир қатор кўчаларда транспорт ҳаракатининг чекланиши белгиланди. Бу ҳақда Тошкент шаҳар ҳокимлиги ахборот хизмати маълум қилган.

Жумладан, 21 март куни соат 06:00 дан 16:00 га қадар Бунёдкор шоҳ кўчасининг Муқимий кўчаси билан кесишувидан то Қоратош кўчаси билан кесишувигача;

Қоратош кўчасининг Самарқанд дарвоза кўчаси билан кесишувидан Бунёдкор шоҳ кўчаси билан кесишувигача;

Ўзбекистон кўчасининг Бунёдкор шоҳ кўчаси билан кесишувидан то Олмазор кўчаси билан кесишувигача;

Бобур кўчасининг Ўрикзор кўчаси билан кесишувидан Шаршара кўчаси билан кесишувигача;

Бешёғоч кўчасининг Ўзбекистон кўчаси билан кесишувидан Фурқат кўчаси билан кесишувигача;

Фурқат кўчасининг Шаршара кўчаси билан кесишувидан Навоий кўчаси билан кесишувигача;

Олмазор кўчасининг Ўзбекистон кўчаси билан кесишувидан Бешёғоч кўчаси билан кесишувигача;

Байналмилал кўчасининг Бунёдкор шоҳ кўчаси билан кесишувидан Бешёғоч кўчаси билан кесишувигача бўлган қисмларида, шунингдек, Себзор ҳамда Зарқайнар кўчаларининг туннелга кириш жойидан бошлаб транспорт ҳаракати тўхтатилади.

Қарорда байрам тадбирлари ҳамда халқ сайллари ўтказилиши мўлжалланаётган Себзор кўчасининг Ўзбекистон Давлат цирки майдонига туташ қисми, Тошкент ҳайвонот боғига туташ Боғишамол кўчаси, «Бахт диёр» гузари олди майдонига туташ Шокирариқ кўчаси, Марказий зобитлар уйи (собиқ «Авиасозлар» саройи), Мирзо Улуғбек, Бобур, Ғафур Ғулом номидаги, шунингдек Гулшан, Фурқат, Сувчи даҳасидаги «Қуёшча нури» истироҳат боғларига туташ кўчаларда ҳам вазият тақозо этганда йўлларда ҳаракатланишнинг чекланишига рухсат берилиши кўрсатилган.

21 март куни соат 06:00 дан 16:00 гача метронинг «Миллий боғ» ҳамда «Бунёдкор» бекатларининг «Истиқлол» санъат саройи томони ёпилади.

Қарорда тегишли жамоат транспорти хизмати ташкилотларига тадбирлар ҳамда сайллар якунланиши вақтида хизмат кўрсатувчи транспорт воситаларининг сонини ошириш вазифаси юклатилган.