АҚШ Федерал қидирув бюроси судда Apple ҳукумат билан ҳамкорлик қилиши кераклигини исботлашга муваффақ бўлган тақдирда ҳам, муассаса янги муаммога дуч келиши мумкин: унга ёрдам беришдан корпорациянинг алоҳида ходимлари бош тортади. Бу ҳақда The New York Times’га таяниб, TJournal хабар бермоқда.
Apple’нинг собиқ ва ҳозирги ишчилари сўзларига кўра, компания ходимлари ҳозирданоқ ФҚБ билан судда ютқазишса, нима қилишларини муҳокама этмоқда.
Кўпчилик мутахассислар ҳукумат учун «хилват йўл» яратиб, ўз меҳнатини бир пул қилмаслик учун, иш ташлаш эълон қилиши ёки ҳатто ишдан бўшаши ҳам мумкин.
Компания собиқ ижрочи директори Жан-Луи Гассе сўзларига кўра, Apple’нинг сўнгги йиллардаги молиявий муваффақиятларига қарамасдан, унинг ходимлари орасида ҳамон Стив Жобс принциплари оммабоп бўлиб келмоқда.
«Компанияда ҳалигача эркинлик маданияти, исён маданияти бор. Агар ҳукумат муҳандислардан кўрсатмалар ёки қандайдир ҳаракатларни талаб қилса — унда уларга омад тилаб қоламиз», — деди у.
The New York Times аниқлик киритишича, Apple муҳандислари ишдан ҳайдалишдан қўрқиши амри маҳол. Уларнинг малакаларига бозорда талаб кучли, шу туфайли улар бошқа компанияда катта маош тўланадиган ишларни осонгина топа олади.
Изоҳ (0)