Бир неча кун муқаддам Миср суди Аҳмад Мансур Қуръоний Алини суд қилиб, уни оммавий тартибсизликларда иштирок этишда ва қотилликда айбдор деб топгани жаҳон матбуотида шов-шув келтириб чиқарганди. Гап шундаки, Мансур Қуръоний 4 ёшли боладир, «жиноятлар» содир этилганида, у 2 ёшга ҳам тўлмаган эди. Суд уни шу исм-шарифга эга ўсмир билан адаштириб юборганини тан олди.
Мансур Қуръоний воқеаси ҳақида CNN телеканалига таянган ҳолда Meduza батафсил маълумот келтирди.
Тўрт ёшли Мансур 16 февраль куни ҳарбий суд томонидан Ал-Файюм шаҳрида 2014 йилнинг январида содир бўлган оммавий тартибсизликларда иштирок этгани туфайли умрбод озодликдан маҳрум этиш жазосига ҳукм қилинган 116 судланувчидан биридир. Суд қарорига мувофиқ, мамлакатнинг илгариги президенти Муҳаммад Мурсийнинг тарафдорлари уч кишини ўлдирган (бошқа маълумотларга кўра, тўрт кишини ўлдирган, саккиз кишини ярадор қилган), шунингдек, давлат мулкига зарар етказган.
Ўша пайтда Мансур бир ёшдан эндигина ошган эди. Биринчи марта уни тартибсизликдан бир неча кун ўтиб ҳибсга олишга уринишди. Отаси полициячиларга бир яшар болани кўрсатганидан сўнг ҳуқуқ-тартибот ходимлари унинг ўзини ҳибсга олди.
Боланинг отаси тўрт ой ҳибсда ўтириб, сўнг суд олдида жавоб берди. Судья, барча ҳужжатларни ўрганиб чиқиб, хатолик юз берганини тушунди ва эркакни қўйиб юборди. Шундан кейин, катта Мансур Қуръоний яна қамалишдан хавфсираб, бир ярим йил давомида яшириниб юрди.
Аммо 2016 йилнинг февралида ҳарбий суд отага эмас, фарзандга нисбатан ҳукм ўқиди. Адвокатлар хатоликни исботлаш мақсадида боланинг туғилганлик ҳақидаги гувоҳномасини кўрсатди. Бундан ташқари, ҳуқуқшунос Абу Кафнинг сўзларига қараганда, судланганлар рўйхатида тартибсизликлар куни мамлакатда бўлмаган кишининг ҳам исми-шарифи бор. Бу суриштирув ишларининг шоша-пиша олиб борилганидан далолатдир, деб ҳисоблайди мутахассис.
Гап шундаки, тартибсизликларда айбланган 116 кишининг исмлари воқеа юз берганидан бир кун ўтиб эълон қилинган. Рўйхатга кирган ўсмирлардан бирининг исми-шарифи 4 ёшли Мансур Қуръонийникига айнан тўғри келиб қолган.
ОАВ ушбу воқеага эътибор берганидан сўнг суд болакайга ўқилган ҳукмни ўзгартирди. Учинчи ҳокимият хатосини тан олиб, бола ҳам, унинг отаси ҳам таъқиб қилинмаслигини ва ҳибсга олинмаслигини айтди. Аслида ҳуқуқ-тартибот органларига 16 ёшли Аҳмад Мансур Шарора кераклиги аниқланди.
Бир муддат ўтиб, 4 ёшли бола отаси билан DreamTV хусусий телеканали эфирида чиқди. Отаси бўлиб ўтган воқеаларни ҳикоя қиларкан, бола унинг қўлида ухларди. Оила адвокати Ид Саид Аҳмад Мансур исмли гумондорнинг яшаш жойи нотўғри кўрсатилгани янглишликни келтириб чиқарганини таъкидлаб ўтди.
Шоу чоғида Миср ички ишлар вазирлиги матбуот котиби Абубакр Абдулкарим қўнғироқ қилиб, келтирилган маълумотларни тасдиқлади ва ноҳақ айбланган оилага энди ҳеч нарса таҳдид қилмаслигини яна бир бора таъкидлаб ўтди. Шу билан бирга, Абдулкарим қидирилаётганлар орасида Аҳмаднинг тоғаси ҳам борлигини эслатиб ўтди.
Шоуга, шунингдек, боланинг онаси қўнғироқ қилди. У яқиндагина уйга полиция ходимлари келиб кетганини, боланинг қаерда эканлигига қизиқиш билдирилганини айтди. Аҳмад Мансурнинг тоғаси ҳақида полициячилар ҳеч нарса сўрамаган. Буни эшитиб, оила бошлиғи йиғлай бошлади.
«Мен ёмон нарса қилмадим. Улар боламни олиб қўйишларини айтди. Лекин уни ҳеч ким олиб кета олмайди. Худойим, мени ёлғиз қолдирма», – деди эркак.
Изоҳ (0)