«Kinorama.uz» нашри Алишер Навоий номли киносарой директори ўринбосари Ҳусниддин Эргашев билан суҳбат ўтказди ва ундан «Барон» фильмининг қўлга чиқиб кетишида киносаройнинг ҳам иштироки бор деган гумонларга аниқлик киритишини сўради.
«Нафақат ‘Барон’ фильми, балки бошқа фильмларнинг ‘пират’ дисклари биз орқали чиқиб кетмаслиги эҳтиёт чоралари 100 фоиз кўриб қўйилган. Бундан ташқари кино ижодкорлари томонидан олиб келинган дисклардан нусха олиб, кўчириб бўлмайди (техник тилда айтганда ‘кодланган’)», — деди Эргашев.
Унинг қўшимча қилишича, ҳар куни фильм намойиши бўлганидан кейин, фильм ижодкорлари киносини ўзлари билан бирга олиб кетади. Яна саккиз нафар навбатчи ходим доим залларда ҳам айланиб юриб, томошабинларни назорат қилади.
«‘Барон’ биздан, киносаройдан тарқалгани ҳақидаги гаплар асоссиз ва уйдирма гаплардан бошқа нарса эмас», — дея таъкидлади киносарой директори ўринбосари.
Эслатиб ўтамиз, аввалроқ режиссёр Рустам Саъдиевнинг «Барон» фильми премьерасидан бир ҳафта ўтиб, унинг сифатли нусхаси, «видеоқароқчилар»нинг хатти-ҳаракатлари сабаб, қўл телефонлари ва дисклар орқали тарқалишга улгургани хабар берилган эди.
Изоҳ (0)