Актриса Шаҳзода Муҳамедова Instagram’даги @mashhur_yulduzlar_oilasi саҳифаси фаолиятидан арз қилди, актриса Муқаддас Саъдуллаева эса бу Instagram-аккаунтни судга бермоқчи. Бу ҳақда улар журналист Феруз Муҳаммадга берган интервьюсида айтиб ўтди.
«Instagram’даги @mashhur_yulduzlar_oilasi саҳифаси менинг хунук тушиб қолган эски суратларимни қўйиб, ғийбатга замин яратди. Яқин дугонам, актриса Муқаддас Саъдуллаевани ғийбат қилаверганидан, унинг оиласи бузилиб кетишига бир баҳя қолди. Шу аккаунтни йўқотиб ташлаш керак», — деди Шаҳзода Муҳамедова.
Актриса Муқаддас Саъдуллаеванинг таъкидлашича, @mashhur_yulduzlar_oilasi саҳифаси Муқаддаснинг «турмушга чиққанидан токи бугунги кунгача бўлган ҳаёти ҳақида мухлисларга ғийбат тарқатади».
«Ажрашганим йўқ, аммо Instagram’даги шу саҳифа туфайли оиламизда анча-мунча гап чиқди. Ҳомиладорлик вақтимда бир неча бор улардан бировнинг ҳаётига аралашмасликни, тинчини бузмасликни сўрадим, бироқ мурожаатларим бесамар кетди. Бу саҳифани ўчиртириб ташлаш учун судга арз қилмоқчиман», — деди актриса.
Аввалроқ актриса Шаҳзода Муҳамедова Instagram’даги унинг номидан очилган сохта аккаунтлардан шикоят қилиб, улардан бири актрисага: «Нега менинг номимдан саҳифа очиб олдинг?!», — деб таҳдид қилганини айтиб ўтганди.
Изоҳ (0)