Олимлар гравитация тўлқинларини қайд этди. Уларни Альберт Эйнштейн башорат қилганига қарамай, тўлқинлар мавжудлиги тажриба орқали энди исботланди, дея хабар бермоқда Meduza Вашингтондаги матбуот анжуманига таяниб.
Аниқлашга эришилган тўлқинлар манбаси Ердан миллиард ёруғлик йили масофасидаги иккита қора туйнукнинг ўзаро туташиши бўлиб чиқди. Тўлқинлар тадқиқотда қатнашган иккала обсерваторияда ҳам қайд этилди.
Олимлар қора туйнуклар қўшилишидан чиққан товушни ёзиб олишга муваффақ бўлди. Туташиш натижасида ажралиб чиққан энергия қиймати учта Қуёшга тенгдир.
Нашр ҳодисани содда тарзда тушунтириб берди. 1,2 миллиард йил аввал олис галактикада иккита қора туйнук бир-бири атрофида айланган. Уларнинг йирикроғи массасига кўра 36 та Қуёшга, кичикроғи — 29 та Қуёшга тенг бўлган. Вақт ўтиши билан туйнуклар ўзаро яқинлашиб ва тезлашиб борган, охир-оқибат битта улкан қора туйнукка бирлашган. Шу лаҳзада барча томонларга ёруғлик тезлигида гравитация тўлқинлари тарқала бошлаган. Бироқ улар аста-секин сўниб борган, Ерга яқинлашганида эса уларни сайёрадаги бошқа вибрациялардан ажратиб бўлмай қолган.
Гравитация тўлқинларини тутиш учун бир-биридан тахминан уч минг километр узоқликда иккита обсерватория қурилди. Улардаги ускуналар ўта даражада таъсирчанлиги натижасида, тўлқинларни тутишга муваффақ бўлинди.
Қуйидаги видеода эса гравитация тўлқинлари ҳақида тушунча берилган:
Изоҳ (0)