Баҳрайн нефть нархининг тушиши натижасида 4 миллиард доллар йўқотди

Нефть нархининг тез суръатларда тушиб бориши Баҳрайн давлат бюджетида 4 миллиард долларга яқин маблағ йўқолишига олиб келди. Бу ҳақда мамлакат энергетика вазири Абдел Ҳусайн бин Али Мирза маълум қилди, деб хабар беради «Корреспондент.net».

«Нефть ва газ сотувидан Баҳрайн бюджетига тушадиган даромад 2015 йилда 1,7 миллиард динор (4,5 миллиард доллардан кўпроқ)ни ташкил этиши керак эди, 2016 йилги бюджетда ҳам шундай кўрсаткич келтирилган. Шундай қилиб, бюджет тақчиллиги 2015 йилда 1,5 миллиард динор (3,9 миллиард доллардан кўпроқ)ни ташкил этди», — деди вазир.

Унинг прогнозларига кўра, жорий йилда ҳам шундай вазият кузатилиши кутилмоқда.

Бин Али Мирза Баҳрайн бюджетига киритилган нефть нархи баррелига 50 доллар қилиб белгиланганлигини қайд этиб ўтди.

Трейдерлар нефть нархи ўзининг энг пастки кўрсаткичига келиб бўлгани, йилни баррелига 50 долларлик кўрсаткич билан якунлашини башорат қилмоқда.