Миср туризм вазири Ҳишам Зазунинг баёнотига кўра, Россия билан авиақатновлар бекор қилинганлиги учун мамлакат ҳар ойда 280—300 миллион доллар йўқотмоқда, деб хабар қилади «Ведомости».
«Бу фақат тўғридан-тўғри йўқотишлар ва ҳозирда тақиқнинг иккинчи ойи кетмоқда. Бошқа йўқотишларни мен ҳали ҳисоблаганим йўқ. Россия ҳукумати ўз қарорини тез орада қайтадан кўриб чиқишига катта умид билдирамиз», — деди туризм вазири.
Унинг сўзларига кўра, ҳозирда Мисрнинг курортларида Германия, Шарқий Европа, Буюк Британия ва араб мамлакатларидан келган сайёҳлар дам олмоқда. «Аммо бунинг ўзи кам. Россиялик сайёҳлар биз учун жуда муҳим, бу Европадаги энг катта бозор», — деди Зазу.
Айни вақтда Миср ҳукумати нафақат аэропортларда, балки бошқа объектларда ҳам хавфсизлик чораларини кучайтирмоқда.
Эслатиб ўтамиз, Россиянинг «Когалимавиа» авиакомпанияси самолёти Мисрнинг Шарм-аш-Шайх шаҳридан Санкт-Петербургга учиш вақтида ҳалокатга учрагандан кейин Россия Мисрга авиақатновларни бекор қилган эди.
Изоҳ (0)