АҚШнинг Вашингтон штатида камида 3200 маҳбус 13 йил давомида дастурдаги хатолик туфайли белгиланган муддатидан аввал озод этилган. Бу ҳақда махсус матбуот анжуманида штат губернатори Жей Инсли гапириб берди, деб ёзади TJournal.
Унинг сўзларига кўра, 2015 йил охирида Ахлоқ тузатиш муассасалари департаменти компьютер тизимида «ҳибс муддатини ҳисоблашда узоқ вақтдан буён мавжуд бўлган хатолик» топилган. У туфайли 2002 йилдан буён штатдаги маҳбусларнинг 3 фоизи муддатидан олдин қамоқдан чиқарилган бўлиши мумкин.
Хатоликка 13 йил аввал йўл қўйилган: ўшанда штат олий суди департаментдан маҳбуслар «яхши хулқ кўрсатган кунлар»ни ҳисоблаш механизмига ўзгартириш киритишни талаб қилган эди, бунинг оқибатида маҳбусларнинг кўпчилигига «яхши кунлар» аслидагидан кўра кўпроқ ёзилган.
Хатолик аниқлангунига қадар ушбу дастур қўлланиладиган қамоқхоналардан ҳар қандай маҳбусларнинг чиқарилиши бекор қилинди. Тизим 2016 йил 7 январида одатий иш режимига қайтиши кутилмоқда.
Қамоқни муддатидан олдин тарк этган кўпчилик маҳбусларнинг исм-шарифи аниқ бўлса-да, штат қонунига кўра, уларнинг кўпини қамоққа қайтаришмайди.
Изоҳ (0)